2 'pushers' gidakop

CEBU, Philippines - Duha ka gikatahapang ‘pusher’ og shabu nadakpan sa gipahigayong buy bust operation sa kapolisan sa sitio Sta. Maria sa barangay Jagobiao, dakbayan sa Mandaue alas-9 pasado ang takna sa miaging gabii.

Ang nadakpan mao sila si Dexter Abano, 26, ug Rolando Santos, 22, nga pulos nagpuyo sa nahisgutang dapit.

Si Insp. Wilson Abot nga maoy hepe sa kapolisan sa Presinto 3 sa Mandaue City Police Office (MCPO) nga nagbase sa barangay Basak maoy nangulo sa buy bust operation.

Si PO3 Jose Jamero sa kapolisan sa Presinto 3 nga nahinabi sa Banat News miingon nga si Santos nakuhaan og usa ka gamay nga paketeng shabu ug nakuha usab ang 16 ka aluminum tin foil ang nakuha kang Abano.

Sumala pa ni Jamero nakadawat sila og impormasyon bahin sa illegal nga kalihokan sa duha sa maong lugar.

Usa ka police decoy ang mipalit og balig P300 nga shabu kang Santos ug pagtunol niini sa ilegal nga drugas ug pagdawat sa marked money gidakop dayon ang duha.

Giandam na ang kasong kalapasan sa Republic Act 9165 kon Comprehensive Dangerous Drug Act of 2002 batok sa duha.  (BANATNEWS)