Mga Insek nagpasalamat kang Gwen

CEBU, Philippines - Gikalipay kaayo sa mga kadagkoan sa mga Insek dinhi sa Sugbo ang pagbendisyon ni Gobernador Gwendolyn Garcia sa ilang selebrasyon sa Chinese News Year sa miaging Lunes.

Kini samtang ang gobernador ug   ang bag-ong Chinese Consul General Zhang Weiguo maoy mga halangdong dinapit sa Chinese New Year Celebration didto sa Shangri-la Mactan Resort and Spa.

Sa mga seremonyas sa maong kasaulogan sama sa gipahigayong   Lion ug Dragon Dance sa ganghaan sa maong resort ang gobernador uban ang Chinese Consul General ug ubang kadagkoan sa maong resort mipintal og pula nga kolor sa mga mata sa mga lion. Human niini, nagpaka-paka ang mga firecrackers nga gisundan sa pagsabwag sa mga sinsiyo ug mani ngadto sa mga lion kinsa maoy mikaon sa maong sinsiyo lakip na ang gipamitay   nga mga petchay ug ampao.

Misulod ang mga Lion Dancer sa resort ug gilibot ang lain-lain mga bahin niini.

Ang gobernador ug mga kaubanan didto maniudto sa Tea of Springs Chinese Restaurant sa samang resort.

Si Joachim Schutte , ang manager sa Shangrila Mactan Resort and Spa nagkanayon   nga dako kaayo nilang   garbo ang pagtambong ni Gobernador Garcia ug ni Consul General Zhang sa maong selebrasyon. Apan sa maong selebrasyon didto sa Shangrila , ang gobernador mitambong usab sa susamang selebrasyon didto sa Marco Polo Hotel uban sa mga opisyales sa maong hotel ug pipila ka mga dagkong mga negosyanteng Insek dinhi sa Sugbo.  - BANAT NEWS