Suroy-suroy nakapalambo sa turismo

CEBU, Philippines - Gumikan sa paningkamot ni Governor Gwendolyn Garcia nga mapalig-on pa ang nabantug na nga Suroy-Suroy sa Sugbo, misulbong og 13 porsento ang ekonomiya sa turismo sa Sugbo sa tuig 2011 itandi sa tuig 2010.

Kini ang gitug-an ni Vice Governor Agnes Magpale sa mga sakop sa media sa dihang gikuhaan kini og reaksyon bahin sa nahatag nga kalamboan sa ekonomiya ning lalawigan sa mga lokal ug langyaw nga mga turista nga mikuyog sa Suroy-Suroy sa Sugbo. Matud pa ni Magpale nga sa dihang gi-imbitar siya sa kalihokan sa Hotel Resort and Restaurant Association of Cebu (HRRAC) migawas didto ang kasayoran bahin sa report sa National Statistical Coordinating Board mahitungod sa pagsaka sa ekonomiya sa turismo dinhi sa Sugbo.

Kini tungod kay ilang nasuta nga ang 75 porsento sa kinatibok-ang kwarta nga gidala sa mga langyaw nga turista ug mga balikbayan ila gyung gastohon dinhi sa Sugbo.

Tungod niini, si Magpale miingon nga ang maong kalambuan dako kaayo og ikatampo sa mga pagkabig og dugang mga turista nga makapauswag sa dagan sa ekonomiya ning lalawigan. (BANATNEWS)