Giagtang pagpusil patay

CEBU, Philippines -  Maayong pagkabuslot sa agtang sa usa ka lalaki human kini gipusil pasado alas-2 sa kaadlawon diha sa barangay Oba-ob lungsod sa Argao. Ang biktima nailhan nga si Julie Datuin, 22, molupyo sa sitio Catagbacan barangay Mabasa sa nahisgutang lungsod.

Sa pakighinabi sa Banat News ni PO2 Benjamin Gerozaga, sa Argao Police Station mibutyag kini nga ang biktima naglingkod diha sa usa ka tindahan dihang kalit kining giduol sa usa ka wala mailhing lalaki ug gipusil kini sa agtang.

Ang mamumuno daling misibat padulong sa ngitngit nga lugar ug wala na maabti sa kapolisan.

Matud pa ni Gerozaga nga sa wala pa mahitabo ang insidente ang biktima mitan-aw sa last counting sa kandidata sa ilang lugar tungod usab sa umaabot nga kapistahan.

Midugang si Gerozaga nga posibleng natripan lang ang biktima sa mga walay lingaw nga tawo apan ila gihapon nga susihon kun unsa ang hinungdan sa pagpamusil niini. (BANAT NEWS)