1 sa 3 ka Koreana namatay sa dagat

CEBU, Philippines - Patay ang usa sa tulo ka mga Koreana human dasmagi sa usa ka pumpboat ang banana boat nga ilang gisakyan   sa kadagatan sa Blue Water Resort sa barangay Maribago sa dakbayan sa Lapulapu, kagahapon sa alas 12 pasado ang takna sa udto.

Ang namatay mao si Ji Sung Sooc, 50 anyos, samtang ang mga kauban niyang angol mao sila   si Park Mi Su, 51, ug Lee Ug Kuying, 56, kinsa pulos temporaryong nagpuyo sa Blue Water Resort.

Si PO2 Winston Ybanez sa homicide section sa kapolisan sa maong dakbayan nga nahinabi sa Banat News miingon nga giguyod sa Jet Ski nga gimaneho ni Jovanni Paquibot, hingkod nga taga barangay Sabang sa isla sa Olango sa maong dakbayan ang banana boat nga gisakyan sa mga biktima.

Dihang milabay usab sa maong lugar ang pump boat nga gimaneho usab ni Aliser Tongco, hingkod, nga taga barangay Tingo sa isla gihapon sa Olango uban sa mga pasahero nga miabang lang sa maong sakyanan samtang naglingawlingaw sa kadagatan sa maong higayon   kalit nga nadasmagan niini ang banana boat nga gisakyan sa mga biktima.

Gumikan sa kakusog sa maong pagkadasmag nangalagpot sa dagat ang mga biktima.

Dali nga giluwas sa mga tawo nga diha sa palibot ang mga biktima ug paghiabot niini sa daplin gikarga usab   dayon sa Emergency Rescue Unit Foundation (ERUF) paingon ngadto sa Mactan Doctors Hospital.

Apan matud pa ni PO2 Barluado nga Ji Sung Sooc kinsa nakasinati sa grabing pagkabun-og sa lawas namatay human sa pipila ka gutlo sulod sa tambalanan.

Si PO2 Carlos Barluado sa homicide section sa kapolisan sa maong dakbayan nga nahinabi sa Banat News miingon nga paingon sa Coral Reef sa barangay Marigondon ang pumpboat nga gidala ni Tongco. Sa pagkakaron nagtingkagol na sa prisohan ang suspetsadong si Tongco, samtang giandam na ang kaso nga isang-at batok kaniya. (BANAT NEWS)