Hustisya kang Ellah Joy

CEBU, Philippines - Kinahanglang bayran sa mga responsable ang pagpatay sa 6-anyos nga si Ellah Joy Pique kini bisan paman nakapasaylo na kanila ang mga ginikanan sa bata.

Si Renante Pique, amahan sa gidagit ug gipatay nga si Ellah Joy miduaw kagahapon sa dapit diin gilabay ang patay’ng lawas sa iyang anak diha sa bung-aw sa barangay Sayaw, sa lungsod sa Barili.

Si Renante midagkot og 15 ka mga kandila ug mihalad og buwak ug sa mga paboritong pagkaon ni Ellah Joy.

Sa report sa TV Patrol Central Visayas si Renante naghilak nga nagkanayon “wa ko magdahom nga niining Nobiyembre uno maapil na pod diay siya sa amoang gi-ampo. Ang Ginoo makapasaylo man gani, pero dapat lang gyud niya (mga suspek) bayran sa atong balaod ang iyang sala nga nahimo, ako makapasaylo man ko kay bisan unsaon nako og dumot niya dili naman to mabuhi si Ellah Joy gud, bisan og ako pang tagud-tagoron ang ako lang nga bayran gyud niya pinaagi sa atong balaod ang sala nga iyang nahimo.”

Kahinumduman nga si Ellah Joy gidagit niadtong Pebrero 8, 2011 gikan sa ilang eskwelahan sa barangay Calajo-an, lungsod sa Minglanilla ug pagkasunod adlaw napalgan na ang patay’ng lawas niini diha sa barangay Sayaw.

Ang usa sa gitumbok nga suspetsado sa maong krimen nga si Bella Ruby Santos kinsa nagtingkagol na karon sa Naga City Jail.Lakip sa akusado ang Briton nga uyab ni Santos nga si Ian Charles Griffiths nga atoa sa Britanya. - Brenda D. Batuto/EIM (BANAT NEWS)