4 nadakpan sa saturation drive
CEBU, Philippines - Upat ka kalalakin-an ang nadakpan sa gipahigayong saturation drive sa kapulisan sa barangay Duljo-Fatima ning dakbayan niadtong Huwebes sa gabii.
Ang mga nadakpan giila nga sila Zaldy C. Mendoza ,38, Ricardo L. Cajuelan, 34, Jonel Pelarin, 23, ug Arbie Dechos, 32, nga residente sa barangay Basak San Nicolas ug barangay Duljo Fatima ning dakbayan.
Matud pa ni SPO2 Jeffrey Diola sa City Intelligence Branch (CIB) ang upat kadudahan kaayo ang mga lihok maong nagduda silang manggamitay sila og ilegal nga drugas sa maong lugar.
Dihang ilang giduol kalit nga nanagan apan pulos sila nakuptan sa mga polis.
Apan sila si Mendoza ug Pelarin mihimakak nga sila mga manuyopay og ilegal nga drugas sanglit padulong lang unta sila sa balay sa ilang higala aron mag-inom dihang ilang nasugatan ang mga polis ug kalit nga midakop kanila.
Si Mendoza mipasangil nga giguyod siya sa mga polis hinungdan sa mga pangos nga iyang nahiaguman sa tuhod.
Samtang si Dechos nangangkong natulog ra siya sa ilang balay dihang gipukaw sa mga polis ug gidakop siya. Iyaha usab gipasangil nga ‘planted’ ang nakuhang drug paraphernalia gikan kaniya.
Ang mga suspetsado gikatakdang pasakaan og kasong kalapasan sa Sec. 12 article 11 of R.A 9165. (BANATNEWS)
- Latest
- Trending
