Tuition sa State Colleges gikabalak-ang motaas

CEBU, Philippines - Gikabalak-ang mosaka ang martikula edukasyon sa sunod tuig gumikan sa kagamay sa budget nga gigahin sa gobiyerno ngadto sa unibersidad ug state colleges sa nasud.

Kini maoy gibutyag sa national chairperson sa Anakbayan nga si Vencer Crisostomo sa dihang nahinabi kini sa Banat News kagahapon pinaagi sa telepono.

“Kawawa naman yung mga estudyante, sila kasi maapektohan dito. Sana maglaan naman yung gobiyerno ng eksaktong budget sa edukasyon,” sumala pa ni Crisostomo.

Nasayran nga mi-request og P45 billion nga budget alang sa 2012 ang Philippine Association of State Universities and Colleges apan P21 billion ra ang gihatag sa gobiyerno.

Sumala pa ni Crisostomo nga moduso sila og proposal sunod semana sa kongreso aron isugyot nga pun-an ang budget sa edukasyon ug kuhaan ang budget sa intelligence fund ni Presidente Benigno Noynoy Aquino III aron ipuno sa budget sa edukasyon.

Matud pa niya nga importante kaayo ang tingog sa kabatan-onan karong panahona alang sa maong kawsa nga mapun-an ang budget sa edukasyon.

Kahinumduman nga nag-walk out ang mga tinun-an sa state colleges sa miaging adlaw agi’g pag-protesta sa gobiyerno tungod sa maong budget cut sa edukasyon.

Nagkanayon si Crisostomo nga tungod sa maong kakulang sa budget gikabalak-an sa grupo nga daghang mga estudyante ang mohunong na sa pagtungha tungod sa kalisod. (BANAT NEWS)