Ouano-Gonzales ambush gitutukan

CEBU, Philippines - Adunay pagduda karon ang mga imbestigador sa Investigation and Detective Management Branch sa Mandaue City Police Office nga ang mi-ambush sa negosyanteng babaye ug sa negosyanteng si Antonio Ouano niadtong bulan sa Hulyo usa ra ka grupo.

Si Inspector Ramil Morpos, ang luyoluyong hepe sa IDMB, sa pakighinabi sa igsuong pamantalaan sa Banat News nga The Freeman nagkanayon nga ilaha karong gisusi og maayo ang maong kaso.

Kini gumikan sa pagdudang posibleng usa ra ka grupo ang mihimo sa duha ka buwag nga krimen. Niadtong milabay’ng semana gi-ambush patay si Iris Marie Gonzales (dili Hugo base sa nahaunang report) gibanhigan samtang luwan sa iyang sakyanan kuyog ang kapuyo ug electrician diha sa eskina sa A. Soriano ug Plaridel Ave. sa dakbayan sa Mandaue. 

“Pareha lang og pamaagi pero dili ta maka-ingon sa pagkakaron nga mao na ba gyud ug wala pa ta’y gi-point,” pasabot pa ni Morpos.

Matud pa nga ang mga killers ni Gonzales nagsunod luwan sa usa ka motorsiklo dayon mi-overtake paghunong sa stop signal diha sa driver’s side dayong paulan og bala sa biktima.

Hinuon si Morpos miklarong wala nila ipasabot nga pareho ra ang tawong mipusil sa duha ka biktima sa managlahing ambush tungod kay base sa pamahayag nga ilang nakuha sa duha ka kaso, ang gunman ni Ouano dagko og panglawas samtang kasarangan ra ang killer ni Gonzales.

Ang IDMB nakig-alayon na sa Provincial Intelligence Branch aron pagpangayo sa listahan sa mga notadong guns-for-hire sa lalawigan.

“Aside sa province pirmi mi mo-coordinate sa Lapu-Lapu. Double time mi ani kay duha ka kaso namo ron ang wala pa ma-solve,” pasabot pang Morpos.

Si Gonzales, 37, maoy tag-iya sa Stockland International Furniture sa barangay Paknaan ug adunay piggery sa amihanang bahin sa Sugbu.

Adunay laing tulo ka mga kauban si Gonzales sa iyang sakyanan nga mao sila si Crisostomo Alcala, 39; Roel Relavo, 40 ug Irene Alcoba nga pulos nakalingkawas. (BANAT NEWS)