Gwen nangopya sa Daanbantayan - Loot

CEBU, Philippines - Gipasanginlan nga nangopya si Gobernador Gwendolyn Garcia sa Haladaya Festival sa   lungsod sa Daanbantayan sa iyang pagpasiugda sa Pasigarbo sa Sugbo   nga giisip karong   mother of all festival sa lalawigan sa Sugbo.

Sa pamahayag nga gipalanog ni Daanbantayan Mayor Malou Loot atol sa Haladaya Festival   sa maong lungsod niadtong Martes, siya nagkanayon nga ang Haladaya Festival sa Daanbantayan maoy labing una nga festival sa Sugbo ug ang tanang sistema nga gisagop niini gikopya usab sa gobernador sa lalawigan nga nagpasiugda sa Pasigarbo sa Sugbo. 

Gisaysay sa mayor ang Haladaya Festival iyang gimugna niadtong tuig 1998 atol sa iyang unang termino nga pagka mayor sa lungsod diin ang gobernador sa Sugbo niadtong higayona mao pa si 2nd district congressman Pablo Garcia ang amahan ni Gobernador Gwen Garcia.

“Di ikalimud nga ang Pasigarbo sa Sugbo namugna gumikan kay daghan naman sa kalungsoran nga nipahigayun usab og ilang festival,” dugang batbat ni Mayor Loot nga gipabati live sa Bantay radio.

Matud sa mayor nga matag tuig kanunay nga nagmalampuson ang Haladaya festival tungod sa ilang pagtinabangay ug hiniusang paningkamot sa tanang mga opisyal sa lungsod nga gipahaom usab sa kapistahan sa ilang patron Sta. Rosa de Lima.

Lakip sa misaksi sa maong festival mao si Bise Gobernador Agnes Magpali, Kongresista Benhur Salimbangon sa 4th district, bokal Benjun Mondigo, Bokal Sun Shimura sa 4th district ug bokal Arleigh Sitoy sa 6th district apan wala motambung sa maong okasyon si Gobernador Garcia

Si Mayor Loot   sa iyang pagpamulong milakbit sa pag-ingon nga si Bise Gobernador Magpale maoy tinuod nga inahan sa probinsiya sa Sugbo.

Nasayran nga wala sa maayong relasyon si Mayor Loot ug si Gobernador Garcia sa mga nilabay’ng mga bulan human mangluod ang mayor tungod kay daghan nang higayon nga gibali- bali kini og kasaba dihang mibisita siya sa buhatan sa gobernador sa Kapitolyo. Ang labing uwahi niini mao ang kapakyas pagsalmot sa Daanbantayan sa Pasigarbo sa Sugbo sa miaging tuig nga mao unta kini ang defending champion niadtong tuiga.

Apan mipasabot ang mayor nga ang kadako sa gasto maoy hinungdan sa wala nila pagsalmot   sa maong kalihokan.  - BANAT NEWS