Koreano nakuhaan og cocaine

CEBU, Philippines -  Usa ka Koreano ang nagtingkagol karun sa karsel sa kapolisan sa syudad sa Lapu-lapu human kini makuhai og cocaine pasado alas-2 kaadlawon sulod sa usa ka motel sa sitio Sangi barangay Pajo sa maong dakbayan.

 Ang nasikop mao si Jun Min Park , 28, taga Seoul , South Korea ug kasamtangan nga nag-istar sa Queensland Motel sa maong lugar.

Sa pakighinabi sa Banat News ni Inspector Glenn Hife, sa City Anti-Illegal Drug Special Operations Task Force nga aduna silay impormante nga mipahibalo sa iyang nasaksihan sa Koreano sulod sa iyang lawak.

Matud pa ni Hife nga ang impormante nagkanayon nga iyang nakit-an ang Koreano nga adunay gising-ot nga puti nga powder nga sa iyang pagtuo nga shabu.

Gawas niini, gikatingala usab sa impormante, mitug-an nga namatikdan niini nga magpunay og sulod-gawas ang Koreano sa lawak niini hinungdan nga misumbong na siya sa kapolisan.

Dihang nangabot ang mga polis ilang nasugatan diha sa gawas ang suspek apan dihang ilang giduol ug nagpaila silang polis mikaratel kini og dagan hinungdan nga ilang gigukod ug nadakpan.

Sa pagrekisa sa mga polis sa maong langyaw nakuha gikan kaniya ang usa ka putos nga daw pulbos nga dihang ilang gipatan-aw sa PNP Crime Laboratory positibo kini nga cocaine nga may .22 gramos ang timbang.

Sumala pang Hife miangkon si Park nga tiggamitan gyud siya niini.

Matud pang Hife nga turista gyud ang maong Koreano ug gikan pa kini sa Australia una pa milahos dinhi sa Sugbo, si Hife nagtuong ang tuyo ra gyud sa maong Koreano dinhi mao ra gyud ang cocaine tungod kay kini giingong mibutyag nga barato ra ang cocaine dinhi.   - (BANAT NEWS)