Alvin G. mitabang sa beautification project

CEBU, Philippines - Usa si kanhi Mayor Alvin Garcia ang mihatag og kooperasyon sa beautification project sa Osmeña Boulevard .

Sa status report sa Beautiful Cebu Movement Foundation, Inc.,nga gipangulohan ni Mariquita Salimbangon-Yeung, nasayran nga si Garcia maoy nagpaayo sa walang bahin sa skywalk sa Fuente Osmeña inubanan usab sa mga tag-iya sa nagkadaiyang establisamento sa maong dapit.

Suma pa ni Yeung nga walay sagol pamolitika ang maong proyekto sanglit usa lang kini ka tabang sa pagpanindot sa palibot sa siyudad.

Malipayon si Yeung gumikan kay matag establisamento mihatag sa ilang saad nga moayuda sa pagpaanindot sa ilang tugkaran base sa gihatag kanila nga desinyo busa pareho na unya puhon ang landscape sa mga establisamento sa Osmeña Boulevard.

Nagkanayon si Yeung nga dako kaayo og natabang ang pribadong sektor busa   sa P55 ka milyon nilang target nga budget alang sa maong proyekto, 40% na lang niini ang ilang problemahon gumikan sa pagtambayayong sa mga negosyante.

Nasayran nga si Henry Sy, chairman sa SM Prime Holdings misaad usab nga motabang sa maong proyekto uban kang Manuel Pangilinan ang chairman sa Philippine Long Distance Telephone (PLDT).

Wala pa hinuon hisayri kung unsa nga klase nga tabang ang ihatag sa nahisgutang mga negosyante.

Target sa maong grupo nga taposon nila ang ilang proyekto sa maghinapos   ang Disyembre. - (BANAT NEWS)