Laing mga kaso ipasaka batok ni Santos

CEBU, Philippines - Pormal nang ipasaka sa Task Force Ellah Joy karong semanaha ang laing kaso batok ni Bella Ruby Santos ug uyab niini nga si Ian Charles Griffiths kinsa nalutsan og warrant of arrest sa kasong kidnapping with homicide kalabot sa pagdagit ug pagpatay kang Ella Joy Pique, 6, niadtong Pebrero 8, 2011 didto sa barangay Calajoan sa lungsod sa Minglanilla Cebu.

Ang duha ka kaso nga ipasaka sa task force batok kang Santos ug Griffiths mao ang attempted abduction ug anti child pornography.

Si Sr. Supt. Patrocinio Comendador, tigpamaba sa task force nga nahinabi sa Banat News nagkanayon nga depende lang asa sa duha ka kaso ang ilang masang-at og una sa piskaliya karong semanaha.

Siya mitataw nga iya nang gi-follow-up ang Children’s Legal Bureau (CLB), Naga City Police station ug Provincial Investigation and Detective Management Branch (PIDMB) aron ila nang mapasaka ang laing kaso batok kanila ni Santos ug Griffiths.

Ang duha ka kaso may labot gihapon kini sa pagsuway og dagit sa usa ka 9 anyos nga batang babaye didto sa barangay Colon-Naga sa wala pa dagita si Pique niadtong adlawa. Samtang ang ikaduhang kaso mao kadtong ilang nakuha sa DVD nga ilang nasakmit atol sa pagronda nila sa balay ni Santos didto sa barangay Inayagan. Matud ni Comendador nga magsubay gihapon sa proseso ug patubagon sila si Santos ug Griffiths sa piskaliya kalabot niining laing mga kasong gipasaka sa task force.

Sa laing bahin nagkanayon si Comendador nga ang task force may gi -follow-up na karon bahin sa nahimutangan ni Santos busa sa madugay ug sa madali mahulog ra gihapon siya sa mga kamot sa mga otoridad.  - BANAT NEWS