Police nga mitambong og "birthday" imbestigahon

CEBU, Philippines - Ang officer-in-charge sa Talisay City Police Station (TCPS) nga si Chief Inspector Eddie Recamara mibutyag nga iyang imbistigahon ang taho nga may mga sakop siyang polis nga mitambong sa birthday party sa anak sa usa ka kriminal sa maong dakbayan.

Matud pa ni Recamara nga di lamang kaon ang gihimo sa maong mga polis kundi didto pa gyud mangatulog sa balay ni Reynaldo Villas, ang suspetsadong   mipusil patay kang Rolly Rodrigo, ang head guard sa Alpha Executive Homes sa barangay Lawaan III.

Si Dina Rodrigo nga   anak sa biktima, maoy mibutyag sa mga tigbalita kalabot sa maong mga polis sa TCPS nga mitambong og birthday party sa anak ni Villas   sa sitio Bliss, barangay Lawaan III ug didto pa mangatulog sa miaging gabii.

Ang maong pagbutyag ni Dina giatol samtang si Villas gipresentar na sa buhatan ni Sr. Supt. Patrocinio Comendador, hepe sa Cebu Provincial Police Office (CPPO) niadtong Martes sa buntag. Si Villas nasikop pinasikad sa warrant of arrest niadtong Lunes sa gabii didto sa iyang balay pinaagi sa mga sakop sa Provincial Intelligence Branch nga gipangulohan ni PO2 Ramil Villaluz.

Si Recamara sa iyang bahin, nagkanayon nga giawhag niya ang mga paryente ni Rodrigo nga makighinabi kaniya ug pormal nga mosang-at sa ilang reklamo uban sa pag-ila sa mga ngalan sa polis nga gitumbok nilang mitambong sa birthday party   sa anak ni Villas.

Matud pa ni Recamara nga diha-diha   iyang imbistigahon ang maong mga polis sa panahong masayran niya ang mga ngalan niini.

Si Rodrigo gipatay niadtong Disyembre sa milabay’ng tuig dihang si Supt. Henry Biñas pa ang hepe sa TCPS. (WC)   - (BANAT NEWS)