Gwen mihimakak sa pasangil kaniya

CEBU, Philippines - Kusganong gihimakak ni Gobernador Gwen Garcia ang laing pasangil sa kaatbang niya sa politika   nga mihapit kuno siya sa COMELEC Manila aron pagsuna sa election protest sa iyang running mate nga si Glenn Soco batok kang anhing Vice Governor Gregorio Sanchez sa iyang pagbiyahe ngadto sa Ilocos Norte sa miaging semana.

Matud pa sa gobernador nga dili tinuod ang maong pasangil ni Glycelda Gigi Sanchez, anak sa kanhi bise gobernador Sanchez nga matud pa nagpunay kuno siya og follow-up sa kadaugan sa kaso ni Soco.

Si Garcia nagkanayon nga human sa iyang pagbisita sa Ilocos Norte mipauli dayon siya nganhi sa Sugbo aron sa pag-atiman sa mga gimbuhaton ug wala na siya’y higayon sa pag-adto sa COMELEC Manila.

Iyang gitataw nga ni bisan makausa wala gyud siya makaadto sa COMELEC Manila ug gani wala siya makatultol asa kini nahimutang.Giklaro sa gobernador nga usa ka hearsay lamang ang gibasehang pasangil ni Gigi Sanchez kinsa mipasangil nga nakakita kuno kini kaniya nga miadto sa buhatan sa COMELEC Manila.  - BANAT NEWS