Usa ka 'wanted' natiklo sa polis

CEBU, Philippines - Nasikop sa kapolisan sa dakbayan sa Mandaue ang usa ka lalaki nga wanted sa kasong murder sa dakbayan sa Sugbo sa milabay’ng gabii. Ang nasikop mao si Ricky Batiller, 20, ug residente sa Barangay Alaska -Mambaling, dakbayan sa Sugbo.

Matud pa ni Insp. Wilson Abot, hepe sa kapolisan sa Station 5 sa Mandaue City Police Office (MCPO) nga dugay na nilang gipanid-an si Batiller nga nalambigit sa pagpayuhot og illegal nga drugas sa maong dapit hinungdan   nga nagpahigayon   sila og buy bust operation.

Nasakmit sa kapolisan gikan ni Batiller ang usa ka gamay’ng pakete sa gituhoang shabu ug sa dihang gihiling ang kalawasan niini nakuha ang laing 3 ka gagmay’ng pakete sa shabu, mga   kahimanan sa pagsuyop sa shabu, ug ang P200 nga buy bust money kun kwartang minarkahan nga gigamit sa kapolisan pagbayad sa shabu.

 Midugang si Insp. Abot   nga dihang ilang gisusi , nasuta nila sa rekord ni Batiller nga aduna kini pending Warrant of Arrest sa kasong Murder nga nahitabo sa Barangay Mambaling .

Gitakdang ipresentar kini ngadto sa korte sa dakbayan sa Sugbo gawas sa lain niyang kaso sa illegal nga drugas sa dakbayan sa Mandaue nga ipasaka sa kapolisan ngadto sa piskaliya. Si Batiller kasamtangang gibalhug sa detention cell sa Police Station 5 sa MCPO samtang nagpaabot sa kasong ipasaka sa kapolisan. (BANAT NEWS)