Prinsipal naunay sa live wire sa bintana

CEBU, Philippines -  Patay ang usa ka prinsipal human kini maapil og kasunog tungod sa giingong gitaod niining live wire nga pangontra batok sa mga kawatan apan maoy nakapaugdaw hinuon sa iyang panimalay sa sitio Canticson sa barangay Gairan siyudad sa Bogo kagahapon sa ala 1:00 sa sayong kaadlawon.

Ang tag-iya sa panimalay nga naapil og kasunog ug napagod na ang kalawasan dihang naugkat sa mga sakop sa kabomberohan mao si Jose Embert Dinoy Catarata, 43, nga prinsipal sa Udlot National High School sa barangay Udlot sa maong siyudad.

Matud ni SPO3 Reynaldo Rosesenia, imbestigador sa Bogo Police dihang nahinabi sa Banat News nadawat sa kabomberohan ang alarma sa sunog ala 1:17 sa kaadlawon dihang usa ka concerned citizen ang nanawag bahin niini. Subay sa pasiunang pakisusi sa Bogo Fire Station nasuta nga kalit nga miulbo ang kalayo gikan sa sala sa pinuy-anan sa nag-inusarang nagpuyong biktima.

Matud pa nga duna pay nakadungog nga nagsiyagit kini nga nangayo og tabang apan walay nahimo ang mga silingan gumikan kay ang mga bintana niini sa panimalay adunay iron grill.

Gani, dunay silingan nga misuway pa unta og salbar pinaagi sa paglangkat sa birha sa bintana apan walay nahimo tungod kay nakuryentihan kini sa live wire nga gikutay hinungdan nga wala gyud matabang ang maong prinsipal.

Samtang si PO3 Allan Dosdos mibutyag usab diha nga nahinabi sa Banat News nga gituyo sa biktima base sa ilang nakuhang impormasyon ang pagbutang og live wire sa birha sa mga bintana aron dili makasulod ang mga kawatan.

Kini human sa makaduha ka higayun nang gisuwayan og lungkab ang panimalay niini tungod kay wala may nahibilin sa panimalay niini kun mo-report na kini sa tunghaan.

Matud pa ni Dosdos nga base sa report sa kabomberohan mokabat sa P300 mil ang danyos sa maong sunog ug nakontrolar kini sulod lang sa pipila ka minutos apan naugdaw na usab ang maong panimalay.

Gihulagway ni Dosdos nga ilang napalgan ang patay’ng lawas sa biktima sulod sa iyang kwarto nga nag-ubo ug napagtong na ang lawas, nasuta sa medico legal nga na-suffocate sa aso ang biktima una pa nasunog.

Butyag usab ni Dosdos nga sa iyang banabana, igo nalang mihapa ang biktima sa salog sa paniguro nga makalikay kini sa aso apan wala gihapon kini makagawas tungod kay ang bugtong agi-anan sa iyang panimalay mao lang gyud ang main door nga nagdilaab na usab.

Dugang pa ni Dosdos nga ang faulty wiring maoy nakita sa kabomberohan nga hinungdan sa kalit nga sunog niini.

Kasamtangan karun nga nahimutang sa Saint Peter Funeral Homes ang patay’ng lawas sa biktima. (Ug Lesley Caminade-Vestil/EIM) (BANAT NEWS)