Dealer sa softdrinks gitulis

CEBU, Philippines - Usa ka dealer og softdrinks ang nabiktima sa duha ka lalaking tulisan nagmotor pasado ala-una sa hapon kagahapon sa Englis, V. Rama barangay Guadalupe ning dakbayan.

Ang tag-iya sa Macias Store nga si Arthur Macias nakugang sa kalit nga pagsulod sa mga tulisan ug misakiyo sa iyang P30 mil nga salapi.

Sa pakighinabi sa Banat News sa hepe sa Guadalupe Police station, Supt. Mario Monilar, kini misaysay nga ang biktima naglingkod sa sulod sa iyang tindahan dihang misulod ug miduol kaniya ang duha ka lalaki nga nagpurong og sinina.

Nakugang nalang kini dihang mideklarar og tulis ang duha ug gikuha ang P30 mil nga igbalayad unta niya sa mga softdrinks nga gi-angkat, lakip sa nadala sa mga tulisan mao ang cellphone sa biktima nga nagkantidad og P20 mil.

Matud pa ni Monilar nga sa dihang milakaw na ang mga tulisan giingong kalmado ra silang nagbaklay patubang sa ilang motorsiklo nga giparking pipila ka tikang gikan sa maong tindahan.

Wala magdahom ang biktima nga tulisan ang duha tungod kay nagtuo siya sa una nga iya ra usab kadto nga ginsakopan tungod kay daghan man usab siya og mga boy.

Butyag pa ni Monilar nga ila karun nga gisubay kun usa ba ka grupo ang mga nanulis og mga dealers ug ahente sa softdrinks sa nagkadaiyang lugar sa Sugbo.

Mihulagway ni Monilar nga susama ra sa usa ka gamay’ng grupo ang maong mga tulisan tungod kay bisan gamay nga kwarta daginoton.

Samtang ang hepe sa Theft and Robbery Section Supt. Bonifacio Garciano, mihulagway usab nga daw usa lang ka grupo ang mga responsable sa ubang insidente. (BANAT NEWS)