Linungkabay mihasi sa Balamban

CEBU, Philippines - Himabaw sa P50 mil ang nasakiyo sa mga kawatan sa duha ka sunod -sunod nga pagpanglungkab sa duha ka dagkong tindahan didto sa lungsod sa Balamban kagahapon sa kaadlawon.

Ang unang gilungkab alas 2:00 sa kaadlawon mao ang Welcris Appliance Corporation nga nahimutang sa Binghay Street, sa barangay Aliwanay, Balamban nawad-an kini og cash nga P36,739.

Ang ikaduhang gilungkab pagka alas 3:00 sa kaadlawon mao ang New Balamban Hardware nga nahimutang sa merkado publiko sa lungsod ug gipanag-iya ni Gally Conggal, nawad-an usab kini og P10,000 nga cash.

Matud ni PO3 Julius Obanana sa Balamban Police nga didto agi sa atop sa maong mga tindahan ang mga kawatan.

Ang kapolisan nagtuo nga usa ra ka grupo ang responsable sa maong panglungkab nga maoy ilang gipanid-an karon.   - (BANAT NEWS)