Posters, pangalan sa mga politiko panangtangon

CEBU, Philippines - Ipatuman na sa dakbayan sa Sugbu ang pagtangtang sa mga pangalan ug mga posters sa mga politiko nga gipamilit diha sa mga proyektong ‘ilang’ nahimo nga naglakip sa mga imprastraktura ug mga sakyanan.

Gipadayag kini sa mayor human mipadala og kamandoan si Presidente Benigno Simeon "Noynoy" Aquino III pinaagi ni Department of Interior and Local Government (DILG) Secretary Jesse Robredo sa pagtangtang sa mga hulagway ug mga pangalan sa mga elected officials diha sa mga proyekto.

Ang rason sa Malacañang niini mao nga kinahanglan ang serbisyo ngadto sa publiko ug dili publisidad ang ipatigbabaw.

Pipila sa mga politiko usab ang una nang mireklamo kabahin sa maong ‘publisidad’ sa mga incumbent officials nga mokandidato panahon sa eleksyon ug nahimo na kining isyu kaniadto pa.

Gipahimangnoan ni Cebu City Mayor Michael Rama ang mga opisyales sa barangay nga ipatangtang na ang ilang mga pangalan sa nagkadaiyang mga sakyanan.

Pipila sa mga butang sa gobiyerno ug mga imprastraktura nga gipalit ug gipahimo gamit ang kwarta sa publiko gipamutangan og dagway ug pangalan sa elected officials.

Kini naglangkob sa mga tents, lingkuranan, basurahan, garbage trucks, ug uban pa nga mga sakyanan sa gobiyerno.

Ang Cebu City Hall adunay mga buses nga adunay susamang mga ‘publisidad’ nga diin naa ang mga litrato sa mga konsehal, mayor Michael Rama ug Kongresista Tomas Osmeña, samtang sa north district sa dakbayan sa Sugbu mao ang mga barangay mini-buses nga adunay litrato ni kanhi Kongresista Raul del Mar ug sa anak niining mihulip kaniya nga si Kong. Cutie del Mar.

Luyo niining pagpatangtang sa maong mga ‘publisidad’ hingusgan sa dakbayan ang prinsipyong mahatag ang nag-unang panginahanglan sa publiko sakyanan man o imprastraktura apan walay ipakaping ‘publisidad.’ - BANAT NEWS