Nanulis sa silingan nadakpan
CEBU, Philippines - Usa ka suspetsadong tulisan kinsa nadakpan human manulis sa iyang silingan nasakmitan usab og shabu didto sa barangay Cambanay, dakbayan sa Danao sa miaging
buntag.Ang suspestado mao si Nathaniel Lopez, 19 , ulitawo, walay trabaho nga molupyo sa maong dapit, samtang ang biktima mao si Artemio Roble Montes, 56, minyo ug silingan ra sa suspetsado.
Si SPO1 Eldefonso Prusia sa kapolisan sa maong dakbayan nga nahinabi sa Banat News miingon nga kalit lang misulod sa balay sa biktima ang suspetsado nga nagdala og kutsilyo ug mideklarar nga tulis dungan sa pagtion sa kutsilyo ngadto sa biktima.
Dugang pa nga gialigar sa biktima nga gipangayoan siya og kuwarta niini ug dihang nagdumili siya sa paghatag, nasuko ang suspek ug gidunggab siya.
Nagkabuang sa pagpanagang ang biktima maayo nalang kay ang mga bukton ra niya maoy gitaroyan sa kutsilyo.
Matud pa ni SPO1 Prusia nga pipila ka mga silingan sa biktima nga nakamatikod sa maong hitabo maoy mitaho sa kapolisan nga maoy hinungdan nga naabtan sa akto sa mga otoridad ang suspetsado.
Matud pa ni SPO2 Prusia nga dihang girikisa ang kalawasan sa suspetsado, didto ang duha ka paketeng shabu sa bulsa niini busa gisikop dayon sa mga tinugyanan sa balaod.
Kasong robbery ug paghupot sa illegal nga drugas maoy gipasaka sa kapolisan batok sa maong dinakpan. – WC (BANAT NEWS)
- Latest
- Trending
