Cebu City tawgon nang Event City

CEBU, Philippines - Naglaraw si Mayor Michael Rama nga    tawgon puhon og “Event City” ang dakbayan sa Sugbo aron mosamot pagsulbong ang dagan sa turismo ning dakbayan.

Nagkanayon ang mayor nga matag okasyon, dili magpaulahi ang Siyudad sa pagdumala og kalihukan sa eligante nga pamaagi nga makaaghat sa mga turista nga mobisita sa siyudad.

Dili palang dugay nagmalampuson ang selebrasyon sa Chinese new year sa usa ka dakong tindahan sa dakbayan diin napuno kini sa mga pagdayeg gikan sa mga bisita ug misaludo sa mga Sugboanon nga maayo modumala og mga kalihukan.

Dugang pa sa mayor nga mahimong matag buwan adunay usa ka kalihukan nga dumalaon sa siyudad ug usa kini sa mahimong atngan sa mga turista nga moanhi sa siyudad.  

Nagbaha ang mga dagkong kalihukan nga gidumala sa dakbayan ,kini sama sa Sinulog Festival matag Enero, Buhing Kalbaryo matag Semana Santa, Flower Festival matag Nobyembre, Pasko sa Sugbo matag Disyembre ug uban pa.

Nagkanayon ang mayor nga makapalambo sa turismo ang iyang mga plano.  (BANAT NEWS)