Sakop sa daginot gang nadakpan

ORMOC CITY, Philippines  – Usa ka 19-anyos nga construction worker ang gidakop sa kapolisan niadtong milabay’ng kaadlawon human giingong misulod sa buhatan sa Department of Health ug mideklarar og tulis sa mga kawani nag-duty nga nahitabo niadto pang Enero 14.

Sa report nga gisumitir sa imbestigador nga si PO3 Roy Arca, ang gidakop mao si Joel Parilla, kinsa giingong miangkong sakop sa Daginot Gang nga nagpasabot "walang patawad" tungod kay bisan unsang butang nga ilang mabaligya ilang daginuton og kawat.

Si Parilla positibong gitumbok diha sa police station sa mga biktimang mga midwife nga sila si Fe Sambrosio, 54, ug Shera Jean Radin, 40, nga nadestino diha sa Health Department sa barangay San Pablo, sa maong dakbayan.

Matud pa sa mga biktima nga gihimulbulan sila sa suspek sa ilang P37,000 nga kwarta ug kabtangan nga naglakip sa wedding ring ni Radin. Si Radin sa pakighinabi sa tigbalita miingon nga nakaila gyud siya ni Parilla bisan paman nagtaptap kini sa nawong tungod kay nagpuyo kini sa barangay nga diin aduna siya’y napaanak.

Sila si Sambrosio ug Radin miingon nga adunay kaubang lookout si Parilla diha sa gawas ug si Parilla diha miagi sa backdoor dayong tion og armas kanila ug pugsanong mikuha sa ilang mga kwarta ug kabtangan.

Matud pa nga wala dayon mobiya ang suspek sa ilang buhatan ug nangutingkay sa ilang mga gamit ug mga ekipo sulod sa duha ka oras samtang padayong mihulgang di sila patingugon aron dili makamata ang mga tawo sa ikaduhang andana.

Si Inspector Shevert Alvin Machete, nagkanayon nga si Parilla, ilang nadakpan diha sa ilang panimalay ug nakuhaan og usa ka orihinal apan walay lisensyang.45 caliber Colt pistol nga may unom ka buhing bala.

Si Parilla gikatahong miangkon sa pasangil ug miila sa iyang kauban nga usa ka Dennis Florentino kinsa padayon pang gipangita sa kapolisan. (BANAT NEWS)