2 Polis 'nagmaoy'

CEBU, Philippines - Segun sa report ang gireklamo nga hubog mao sila si PO2 Ruben Perater sakop sa Anti-Street Hoodlums Operating Team (A-SHOT) sa Theft and Robbery Section (TRS) sa Cebu City Police Office (CCPO) ug PO2 Clifford Mantua sakop sa Mobile Patrol Group (MPG) ug ang asset nga si Arnel Pacaña nga taga Labangon.

Matud pa nga si Mantua off-duty niadtong higayona giingong gikan nag-inom uban ni Pacaña diha sa Taboan ug samtang sila sakay sa sakyanan ni Perater nakaagi sila sa pundok sa mga tawo diha sa taytayan ug nangutana kung asa ang karerahan.

Giingong giwara-warahan og armas ni Mantua ang mga tawo ug tungod sa kahadlok nagkatibulaag sila og panagan apan usa ka Zacarias Serafin maoy gitionan og armas nila ni Mantua ug Pacaña aron patug-anon kung asa ang video karerahan.

Apan tungod sa kadaghan na sa mga tawo nga midugok kanila, gipatawag sila sa barangay hall aron adto husayon apan sila si Mantua ug Pacaña maoy gitudlo sa mga tawo nga nanion kang Serafin.

Kagahapon sa udto gipatawag ni Sr. Insp. Bonifacio Garciano, hepe sa TRS si Perater. Matud pa ni Garciano nga nag-surveillance si Perater sa mga sakop sa gangster diha sa nahisgutang lugar ug nasigpatan sa iyang sakop nga nagdinaganay na ang mga batan-on. Usa ka Jovy Heramis nakuptan ug nadakpan ni Perater ug nakuhaan og mga paraphernalias ug kwartang P140. Matud ni Garciano nga nasayod siya sa lakaw ni Perater ug lehitimong operasyon ang gihimo niini.

Nagkanayon hinuon si Garciano nga kung dunay imbestigasyon nga ipahigayon andam niyang ipaimbestigar si Perater. Si Perater sa dihang nahinabi sa mga tigbalita hugtanong mihimakak sa pasangil nga siya hubog niadtong higayona.

Sumala pa ni Perater naagian sa may taytayan ang usa ka lalaki nga giingong original gangster (OG) o lider sa Crips Gang nga kauban sa pundok sa mga batan-ong nagtapok.

Matud ni Perater wala gyud silay planong manakop niadtong higayona apan tungod kay lider sa gang ang usa sa ilang naagian ilaha kining gihunongan.

Nakugang nalang sila dihang kalit nga midaghan ang mga tawo dihang ang manag-live-in partner nga sila si Zacarias Serafin ug Mercedita Mahinay nanawag og mga silingan.

Si Mantua gisuwayan unta pagpangita sa mga tigbalita aron kuhaan sa iyang habig apan wala kini makit-i. Si Sr.Supt. Melvin Buenafe mitug-an nga iyang ipaimbestigar ang duha ka polis sa maong reklamo. (BANAT NEWS)