Sinulog 2011 gipangandaman na

CEBU, Philippines - Gipangandaman na sa kagamhanan sa dakbayan sa Sugbo ang pagpahigayon sa Sinulog 2011 ug ang usa sa gitutokan karong ayuhon mao ang rubberized track oval (RTO) sa Cebu City Sports Center (CCSC) nga nangagusbat na.

Matud pa ni Ricky Ballesteros, manager   sa CCSC nga aduna nay walo ka mga supplier kinsa nagtinguha nga mosalmot sa subasta nga himoon sa kagamhanan sa dakbayan aron sa pagpaayo sa RTO.

Ang 400 metros nga gitas-on nga RTO may 16 anyos na ka tuig sukad kini matukod busa nangadugta, nangliki ug nangabuslot na gumikan sa uwan ug init nga nasinatian niini busa nagkinahanglang mailisdan na og bag-o alang sa maayong pagdagan sa mga runner nga motadlas niini.

Miingon si Ballesteros nga gitugyan nila karon sa Cebu City Bids and Awards Committee (CCBAC) ang pag-atiman sa bidding alang sa P35-P40milyones nga kantidad sa gastuhonon sa pagpaayo sa maong goma nga dagananan sulod sa sports center. Midugang si Ballesteros nga molanat sa duha ngadto sa tulo ka buwan ang gidugayon una mahuman ang pag-ayo sa maong oval.

Nahimutang sa likod sa Abellana National School human kini tukora niadtong tuig 1994 ang nahimutangan sa CCSC niadtong gipahigayon dinhi ang Palarong Pambansa.

Nasayran usab nga dili lang init sa adlaw ug uwan ang nakadugta ug nakagusbat sa goma sa maong oval kundi ligid sa mga float nga sakyan sa mga entrante sa Sinulog matag tuig nga mopaso atubangan sa grandstand sa sports center aron husgahan sa mga huwes sa Sinulog. Unya tungod kay goma ang materyal, moburot kini sa hilabihang kainit sa adlaw ug mabasa na sa uwan mahumok pagsamot hangtud nga mabuslot ug magusbat ang goma.

Midugang si Ballesteros nga kining nangadugtang goma hingpit nga ilisan og bag-o aron hapsay ang maong oval ug walay peligro sa mga modagan nga runner niini. Apan ilang gitun-an ang pagbutang una og aspalto nga tabonan sa goma, matud pa ni Ballesteros. (BANAT NEWS)