Sakop sa intelligence group gikasuhan

CEBU, Philippines - Gipasakaan na og kasong illegal possession of firearms   ang kanhi sakop sa Talisay City Intelligence Bureau (TCIB) kinsa gipasanginlang nalambigit sa pagpusil patay sa kanhi gwardiya sa Alfa Executive Homes sa miaging semana.

Ang kaso batok kang Jolito Labrador nga taga sitio Caduldulan, barangay Lawaan III, Talisay didto isang-at sa piskaliya sa dakbayan sa Talisay   kagahapon sa buntag.

Si Labrador gisikop nila ni Inspector Hugo Rio Ipong niadtong Martes sa buntag human nila kini masakmite og armas de fuego uban sa mga bala sa ilang pagronda sa balay sa suspetsado.

Ang maong pagpangronda nahimo pinasikad sa search warrant nga giluwatan ni Regional Trial Court Judge Soliver Peras sa Branch 10.

Si Labrador giingong maoy gisugo pagpangita og tawo nga mopatay kang Rolly Rodrigo, kanhi gwardiya sa nahisgutang subdivision apan ang tawong giingong gi-hire ni Labrador mibalibad.

Si Superintendent Henry Biñas, hepe sa Talisay City Police Station sa pakighinabi niini sa Banat News kagahapon nagkanayon nga si Labrador mihimakak sa mga pasangil batok kaniya dihang ila kining giimbestigar.

Matud ni Biñas nga gipaladman pa nila ang ilang imbestigasyon sa hitabo aron masikop ang giingong utok niini.

Ang kapolisan padayon pa usab sa pagpangita sa lalaking mipusil kang Rodrigo.

Kahinumdoman nga si Rodrigo gipusil patay niadtong Disyembre 8, 2010 sa buntag samtang nagsakay kini sa iyang motorsiklo paingon nang mopauli gikan nga naghatud sa iyang anak ngadto sa tunghaan.

Ang maong pagpamusil nahitabo didto sa national road sa barangay Lawaan I sa nahisgutang siyudad. (BANAT)