Tomas gisaway sa kap sa Punta Princesa

CEBU, Philippines - Gisaway ni Punta Princesa barangay kapitan Jose Navarro si Kong. Tomas Osmeña gumikan sa walay hunong nga pagsaway niini ngadto kang Mayor Michael Rama.

“Hunongon na unta niya ang pagsige og saway ni Mike (Mayor Rama). Mas maayo nga atimanon niya (Osmeña) ang iyang trabaho didto sa kongreso, ug dili magsige og saway sa mga pamaagi ni Rama,” matud pa ni Navarro sa dihang nahinabi sa Banat News kagahapon.

Si Navarro nasakop sa oposisyon apan saludo siya sa kakugihan ni Rama busa iyang gidepensahan ang mayor gikan sa mga pagsaway ni Osmeña.

“Kugihan kaayo si Mike, halos dili na gani matulog tungod kay motrabaho gyud na siya isip mayor. Si Rama kay duna gyu’y baruganan dili sama ni Tomas nga madinumtanon,” dugang pa ni Navarro.

 Ang Punta Princesa nahisakop sa distrito ni Osmeña apan gihulagway ni Navarro nga wala siya’y nabantayan nga kongkreto nga proyekto ang kongresista sa iyang barangay dili sama kang Rama nga mihatag gyud og proyekto bisan naa pa siya sa oposisyon.

Sa laing bahin, giklaro ni Rama nga bisan sa kasungian nila karon ni Osmeña, wala gihapon maapektohi ang ilang relasyon sa asawa sa kongresista nga si Konsehal Margarita Osmeña.

Butyag pa sa mayor nga usa siya ka abogado busa dili siya mamersonal hinungdan nga padayon ang iyang maayong tinagdan ngadto sa kapikas sa kongresista.

“Dili gyud affected ang among trabaho, kay magtinabangay gyud kitang tanan alang sa kalamboan sa atong siyudad. Panahon sa kampanya, amo na nga gisaad ngadto sa katawhan ang maayong serbisyo,” sumala pa ni Rama. Karon nga nagkaduol na ang Pasko, panghinaot pa ni Rama nga mahilom na ang maong isyu gumikan kay karon panahon   sa kasadya ug dili sa panagbangiay.

Apan una na nga gipadayag ni Osmeña sa miaging adlaw nga magpadayon siya nga mosaway kung duna siya’y mabantayan nga hiwi nga pamaagi ni Rama sa pagdumala sa City Hall ug iya kini nga gibuhat gumikan kay iya kini nga katungod isip konstituwente sa dakbayan. (BANAT NEWS)