Medical team para Danao

CEBU, Philippines - Nagpadala na si Mayor Michael Rama og medical team ngadto sa dakbayan sa Danao aron matabangan ang mga pasyente sa diarrhea.

Gilangkoban kini og mga doktor ug sanitary inspector kinsa motabang pagsusi sa sitwasyon sa diarrhea outbreak sa maong dapit.

Ang Danao maoy usa sa mga sister city sa dakbayan sa Sugbo busa kusganon kaayo si Rama nga motabang sa mga problema sa maong lugar.

“Nindot gyud nga adunay pagtinabangay, kung tan-aw nato nga makatabang ta, ato gyud nang buhaton,” sumala pa sa mayor.

Sa samang higayon mipahimangno ang mayor sa publiko nga magmabinantayon sa ilang mga pagkaon ug tubig nga imnon ug sigurohon nga limpiyo kini aron mahilayo sa diarrhea.

Dugang pa ni Rama nga iya usab nga susihon ang kasamtangang panudlanan sa siyudad gumikan kay nagplano siya nga mopadala usab og mga medisina sa Danao.

Kahinumdoman nga mikabat na sa 159 ang mga biktima sa diarrhea outbreak sa Danao ug gani naghuot na kini sa district hospital sa maong syudad.

Ang mga pasyente naggikan kasagaran sa tulo ka barangay nga mao ang Taytay, Tabok ug Cambanay.

Samtang dinhi sa Dakbayan sa Sugbo, walay hunong ang mga sanitary inspector sa pagsuroy –suroy sa nagkadaiyang barangay pagsuta kun wala bay mga kaso sa diarrhea ug ubang matang sa balatian. – BANAT NEWS