Ordinansa sa pamuhi'g iro gipatuman

CEBU, Philippines - Gipatuman sa kagamhanan sa dakbayan sa Mandaue ang ordinansa nga naglatid sa mga kaakohan sa mga molupyo nga nagbuhi og iro sa higayon nga makapaak ug pag-ihaw alang sa pagkaon sa karne niini.

Naglakip sa mga kaakohan sa tag-iya sa iro mao ang abaga sa galastohan ngadto sa mga tawo nga mapaakan o pagbayad og multa nga P25,000 ug 15 ka adlaw nga pag-obserbar sa panglawas human kini makapaak.

Si Geralyn Muania sa dog found sa dakbayan miingon nga ang madakpan sa akto nga moihaw sa iro ang mag-atubang kini sa pagkabilanggo ngadto sa upat ka tuig o mag-agad kini sa hukom sa korte.

Dugang pa niya nga gitinguha karon sa kagamhanan sa maong dakbayan ang paghigot sa binuhi nga iro aron kalikayan nga kini makapaak og tawo.

Matud pa ni Muania nga ang nagbuhi og iro sa dakbayan ang kinahanglan nga moparehistro alang sa pagsiguro sa ilang pagpanag-iya niini.

Si Muania miingon nga kasamtangan karon nilang giplano ang katukoran sa Barangay Coordinating Council sa dakbayan nga ang ilang kaakohan mao ang pag-monitor sa mga laag nga iro ug sa pagdakop niini. (BANAT NEWS)