Kanhi polis gibulit og bala patay

CEBU, Philippines - Gitadtad og bala ang kalawasan sa kanhi polis nga giingon bata-bata kaniadto ni kanhi Bagong Buhay Rehabilitation Center (BBRC) jailwarden Gaudencio “Dodie” Navales human kini giatngan ug gipusil patay kagahapon sa buntag diha sa dalan Causim sa barangay Poblacion lungsod sa Barili kagahapon sa alas 5:00 pasado sa buntag.

Ang biktima mao si Victor Natad Rio Jr., 52, kanhi polis nga nagranggo og SPO1 kaniadto nga nadestino sa BBRC ug sa Cebu City Police Office (CCPO) apan nag-awol ug nataktak ug nagtrabaho nalang isip Job Order employee sa lungsod sa Barili isip tax collector.

Samtang ang mamumuno gihulagway nga duha ka lalaking nag-angkasay sa usa ka motorsiklo.

Matud ni Sr. Insp. Marlon Gumabao, hepe sa Barili Police Station dihang nahinabi sa Banat News subay sa imbestigasyon ang biktima dunay gipalit sa usa ka tindahan sa maong lugar apan dihang mosakay na kini sa iyang motorsiklo kalit lang miabot ang gikatahapang nagkawo dayung pusil kaniya makadaghang higayun.

Pagkahuman niini yano ra kaayo nga milakaw bitbit ang armas ang kriminal ug misakay sa motorsiklo diin magpaabot ang kauban niini.

Matud ni Gumabao naputos og samad pinusilan ang kalawasan niini ug misuway pa unta og dagan apan gitiwasan kini pagpusil hangtud nga natumba.

Ang mamumuno gituohang migamit og .9mm automatic pistol base sa nakuhang mga basiyo diha sa crime scene.

 Ang biktima daling gidala sa Barili District Hospital apan gideklarar nga dead on arrival sa mga doktor.

Gituohan sa kapulisan nga may kalambigitan sa unang trabaho sa biktima sa iyang pagkapolis ang motibo sa krimen sanglit wa man silay nabati nga duna kini kontra sa maong lungsod.

Si Rio nadestino kaniadto sa Waterfront police station dihang ang retiradong si Maj. Navales pa ang hepe niini apan dihang nahimong warden sa BBRC si Navales mi-uban usab kini niya hangtud nga kini nag-awol ug na-dismiss sa pagkapolis. (Uban sa report ni Lesley Caminade)  (BANATNEWS)