CV way krimen sa sangka ni Pacquiao

CEBU, Philippines - Gihulagway sa kadagkoan sa kapolisan sa Central Visayas nga malinawon ang katibuk-ang rehiyon atol sa away ni Manny Pacquiao ug Antonio Margarito niadtong Domingo.

Si PRO-7 Chief Supt. Ager Ontog Jr. nagkanayon nga wala gyu’y mga panghitabo nga natala sa kapolisan sa maong higayon gawas sa minor incident apan walay kalambigitan sa away sa duha ka boksidor.

Gihulagway ni Ontog nga zero crime rate ang Central Visayas atol sa sangka ni Pacquiao ug Margarito ug nagpakita lang kini nga grabe ang impluwensya ni Pacquiao sa matag away niini nga nakapaminus sa crime rate.

Si Sr. Supt. Augusto Marquez, hepe sa Regional Intelligence Division (RID)-7 nagkanayon usab nga didto sa Camp Crame usa lang ka insedente ang natala niadtong Domingo.

Samtang si Sr. Supt. Melvin Ramon Buenafe, hepe sa CCPO nagkanayon nga aduna hinuoy tulis nga nahitabo sa Pardo niadtong Domingo sa udto sa wala pa magsugod ang away ni Pacquiao ug Margarito.

Sa dihang gipangutana si Buenafe kun nalingaw ba siya sa inawayan ni Pacquiao niadtong Domingo, ang iyang tubag mao ni ‘Yes a very good fight’.  (BANATNEWS)