Habal-habal driver gipusil sa nawong

CEBU, Philippines - Naglunang sa kaugalingong dugo ang usa ka habal-habal drayber human kini gipusil sa ulo ug sa iyang lawas kagahapon sa hapon diha sitio Saksak barangay Bunga Lutupan syudad sa Toledo.

Ang biktima nailhan nga si Gilberto Tura Guarez, 32, molupyo sa barangay Lutupan sa maong syudad. Duha ka wala mailhing mamumuno nga luwan sa usa ka kolor puti nga multicab maoy gitumbok nga mipusil kang Guarez.

Sa pakighinabi sa Banat News ni SPO3 Socrates Aparicio, ang team leader sa Lutupan police detachment mibutyag nga ilang naabtan nga nagbuy-od na ang biktima ug wala na kini kinabuhi apan ilaha gihapon kining gidala sa tambalanan ug didto gideklarar nga dead on arrival.

Matud pa ni Aparicio nga nakaangkon og samad pinusilan ang biktima sa iyang tuong bahin sa nawong ug kilid nga bahin sa iyang lawas nga posibling maoy hinungdan sa iyang hinaling kamatayon.

Midugang si Aparicio nga adunay nakakita sa maong krimen nga mibutyag nga ang biktima ug ang mga mamumuno mi-parking diha daplin sa dalan ug nagdungan og lakaw padulong sa kalibunan.

Dangtan og pila ka gutlo nadungog dayon ang buto-buto sa armas ug nakit-an ang duha ka mamumuno nga nagdagan padulong sa multicab ug miikyas, sumala pa nga nagtabon na sa mga nawong ang maong mga lalaki ginamit ang puti nga t-shirts. (BANATNEWS)