Bata-bata ni Joavan misibat
CEBU, Philippines - Usa ka giingong bata-bata ni Joavan Fernandez nalambigit sa insidente sa trapiko ug giingong misibat kini sa milabay’ng adlaw duol sa guard house sa Vista Grande Subdivision, barangay Bulacao, dakbayan sa Talisay.
Ang suspetsado giila lang sa mga polis sa ngalan nga “Jury” taga sitio Cabanayan, sa nahisgutang barangay kinsa nagmaneho sa multicab nga nagtangag sa plakang KEC-802 nga giingong wala marehistro sa Land Transportation Office (LTO).
Ang biktima mao si Bernie Rosagenia, 36, residente usab sa sitio Cabanayan ,drayber sa Honda XRM nga motorsiklo nga nagtangag sa plakang GI-5938.
Ang biktima misulti sa mga polis nga si Jury ilang silingan ug bata-bata sa sinagop sa mayor sa Talisay.
Si SPO4 Henry Obiso, hepe sa Talisay City Traffic Division sa pakighinabi niini sa Banat News kagahapon nagkanayon nga ang multicab nagpundo diha duol sa guard house sa nahisgutang subdivision. Si Rosagenia uban sa iyang asawa nga maoy iyang angkas nagbiyahe gikan sa ilang balay paingon ngadto sa dakbayan sa Sugbo.
Si Jury giingong kalit lang nga mipa-U-turn sa multicab hinungdan nga naigo ang motorsiklo sa biktima ug nalamba kini diha sa karsada.
Si Rosagenia ug ang iyang asawa nakaangkon og bun-og ug pangos sa lawas.
Matud ni Obiso nga daling mikanaog si Jury gikan sa multicab ug iyang gi-lock, dayon gibiyaan niini ang sakyanan sa daplin sa karsada ug wala gyud niya tabanga ang biktima ug ang asawa niini.
Si Rosagenia nanawag dayon og polis ug nangayo og panabang.
Matud ni Obiso nga ilahang gisuwayan og guroy ang multicab sa suspetsado sa ilang multicab sa traffic division apan wala kini madala hinungdan nga ilang gitang-tang na lang ang plaka sa maong sakyanan ug gidala sa ilang buhatan ang maong plaka.
Ang mga polis nangita og paagi nga madala gyud ang maong multicab diha sa ilang buhatan sa barangay Tabunok apan pagbalik pa nila wala na diha ang multicab sa suspetsado.
Gibutyag usab ni Obiso nga ilang gisusi diha sa buhatan sa LTO sa Lawaan I, dakbayan sa Talisay kung narehistro ba ang multicab apan nasuta nga wala makarehistro ang maong sakyanan.
Gisusi usab sa mga polis ngadto sa buhatan sa LTO sa dakbayan sa Sugbo kung narehistro ba didto ang maong multicab apan wala gihapon kini marehistro.
Si Obiso midugang nga mobalik sila ngadto sa buhatan sa LTO sa dakbayan sa Sugbo aron pagsiguro kung wala ba gyud marehistro ang maong sakyanan tungod kay basin nakarehistro na kini ug wala pa lang ma-upload gikan sa ilang manual list.
Ang kapolisan naghuwat usab sa biktima nga mobalik og anha sa ilang buhatan aron mopasaka og kaso batok sa suspetsado. – BANAT NEWS
- Latest
- Trending