Task Force Alpha gipakatap sa LTO

CEBU, Philippines - Gipakatap na sa Land Transportation Office (LTO) 7 ang Task Force Alpha sa kadalanan sa Sugbo niining mga adlawa hangtod ugma aron sa pagsikop sa mga drayber nga malapason sa balaod sa trapiko.

Si LTO 7 Director Raul Aguilus nga nahinabi sa Banat News miingon nga gisugdan nila ang pagpakatap sa mga miyembro sa task force sukad pa niadtong Sabado hangtod na ugma. Matud pa ni Aguilus nga ang usa sa gimbuhaton sa task force mao ang pagpahigayon og check point aron mabantayan ang mga pasahero gikan sa mga tawo nga may dautang tuyo sa ilang pagsakay sa sakyanan sama sa magdala og bomba ug uban pang kargamento nga maghatag og risgo sa kinabuhi sa mga pasahero.

Si Aguilus miingon nga gawas niini ang ubang kalapasan nga mahimo sa drayber ilabi na ning higayona nga midagsang ang mga pasahero mao ang over charging sa plitehan, over loading, cutting trip ug uban pa.

Gipasabot ni Aguilus nga ang maong mga kalapasan sa mga drayber sa sakyanang pasaheroan may silot nga multa nga nagkantidad og P1,500 base gihapon sa ipahamtang nga silot sa korte.

Dugang pa ni Aguilus nga lakip sa ilang butangan og mga tawo nga mobantay mao ang South ug North Bus Terminal sa pagsiguro nga kalikayan ang over loading sa pasahero ug mga kargamento.

Ang mga pantalan dinhi sa Sugbo gidestinohan usab og mga otoridad aron pagsiguro nga dili kaabusohan ang mga pasahero pinaagi sa pagpaningil og plite nga dili na mosubay sa gitugot sa Land Transportation Franchising and Regulatory Board (LTFRB) 7.

Matud pa niya nga sa mga biyahe sa sakyanan sa kalungsoran sa panahon sa pagsaulog sa Adlaw sa mga Kalag ug Todos Los Santos ilang gitahasan sa pagbantay sa kadalanan dinhi sa lalawigan ang kapolisan nga deputized agent sa ilang buhatan.

Si Aguilus mitataw nga andam ang ilang buhatan sa pagdawat og reklamo ug direkta kining ipadangat sa ilang buhatan o manawag lamang kang Adel Belsa sa cellphone. Numero 09085440262 o sa telepono sa ilang buhatan 2538845 ug 2540895. (BANATNEWS)