Engkuwentro sa lapu'

CEBU, Philippines - Engkwentro sa mga dumadapig sa duha ka mga kandidato sa piniliay kagahapon sa Sanggunian ug Barangay mikalas og usa ug miangol sa duha ka mga tanod diha sa sitio Lupa, sa barangay Punta Engaño sa dakbayan sa Lapulapu kagahapon sa kaadlawon.

Sa imbestigasyon sa kapolisan pinaagi ni SPO2 Ernesto Francisco sa Crime Against Persons Desk ang nakalas mao si Demetrio Sumalpong, giilang drayber ni kanhi kapitan ug nagpapili pag-usab nga si Angel Rodriguez nga higpit nga kaatbang ni encumbent barangay kapitan Lourdes Ibag.Samtang ang nangaangol mao ang mga tanod nga sila si Remegio Bantilo, Alejandro Serano Veloria nga nakaangkon og mga samad pinusilan sa ilang kalawasan. Base sa imbestigasyon ni Francisco ang mga tanod nga sila si Bantilo, Veloria, Bienvenido Tenorata, Juanito Dumagin, Renior Siyang ug Nicandro Rodilas luwan sa ilang barangay patrol vehicle niadtong tungura.

Sumala pa sa mga tanod nga miresponde sila sa alarma kabahin sa giingong alegasyon nga adunay nanghakot og mga botante aron pamayran og tag P1,000 matag usa ug pamutangan og edilible ink ang ilang mga tudlo aron dili na makabotar. Sa dihang migawas si Sumalpong uban sa kauban niini nga si Edmund Nuñez luwan sa usa ka motorsiklo diha sa access road nga iya ni Rodriguez ila unta kining sitahon, apan giingong kalit silang gipamusil niini.

Gumikan niini si Bantilo ug Veloria nahiagum og mga samad pinusilan sa kalawasan ug gidala sa Mactan Doctors Hospital, si Sumalpong patay diha-diha.

Matud pa ni Insp. Juan Capacio ang hepe sa Homicide Section atol sa ilang imbestigasyon mihimakak ang mga tanod nga aduna silay armas ug dili sila maoy nakapusil kang Sumalpong. Gimando usab ni Sr. Supt. Mariano Natu-el Jr. ang lawom nga imbestigasyon sa nahitabo lakip na ang pagkalambigit sa polis nga si PO3 Deogines “Dinnes” Carillo nga sakop sa kapolisan sa lungsod sa Liloan.

Matud pa ni Natuel nga base sa mga ebidensiya nga ilang nahipos maoy ilang nasuta nga ang duha ka grupo pulos nakapabuto ug gitataw nga pulos nakalapas sa Comelec gun ban apan walay nangangkong nagpabuto og armas tali kanila.

Si SPO2 Rolito Jumao-as sa homicide section mitug-an nga si Carillo mitug-an nga gikan pa kini sa iyang duty sa lungsod sa Liloan ug mihapit sa balay ni Rodriguez aron hapiton ang iyang asawa nga mitambong sa tigom sa usa sa mga kandidato pagka-kagawad ni Rodriguez ug aron mokuha og mga gamit aron mag-ilis sa iyang uniporme.

Apan nakalitan nalang kini dihang kalit siyang girakrakan ug swerteng nakaligid siya ug nakasulod sa panimalay ni Rodriguez.

Base usab sa pamahayag ni Carillo ngadto ni Jumao-as nga nataymingan lamang nga nahiagi sa maong dapit si Sumalpong nga gisugo sa pagpalit og tubig nga maoy naigo ug namatay.

Si Chief Insp. Ricamora, hepe sa kapolisan sa lungsod sa Liloan mimando na karon sa paghimo og imbestigasyon kang PO3 Carillo nga on duty nga polis apan nganong nalambigit sa pinusilay sa Punta Engaño sa dakbayan sa Lapulapu. (BANATNEWS)