Ombudsman di manghilabot sa isyu bahin sa prangkisa

CEBU, Philippines - Dili una manghilabot ang buhatan sa Ombudsman Visayas sa alegasyon labot sa ilegal nga paghatag og prangkisa sa pipila ka mga opisyales sa Land Transportation Franchise and Regulatory Board (LTFRB) nga personal nga gibulgar mismo ni regional director Benjamin Go.

Sumala pa ni Deputy Ombudsman for the Visayas Pelagio Apostol sa interbyu sa DyRF nga ang iyang buhatan magpaabot hangtud nga si Go mismo ang mopasaka og tukmang kaso batok sa iyang duha ka mga opisyales nga gipasanginlang nakigkunsabo sa pipila ka mga taxi operators aron mapagawas ang dugang prangkisa bisan og gipahunong na ang pag-isyu niini.

Si Go nitumbok sa iyang duha ka mga hearing officer nga sila si Atty. Douglas Sanson ug si Evelyn Carmelita Misal maoy nakigsabot sa mga operators sa taxi aron mapagawas ang dugang prangkisa.

Ang LTFRB sa Manila mipagawas na og moratorium niadtong 2003 nga nagdili na sa pagpang-isyu og prangkisa sa taksi dinhi apan sumala pa sa usa ka report, si Go miingon nga gikan sa 4,000 nga kasamtangang taxi franchises niadtong tuiga nadugangan pa kini og dul-an 2,000 ka prangkisa atol sa pagdumala sa gisundan niining direktor.

Kini maoy hinungdan nga ang mga taxi operators dinhi sa Sugbu mireklamo na gumikan sa nagkadaghang mga taxi nga nagdagan sa Metro Cebu nga nakaapekto na usab sa kinitaan sa ilang mga drayber.

Sa migawas nga mga report, nasuta nga dili lang prangkisa sa taksi ang nangaaprubahan diha sa legal department ug girekomendar nga mahatagan og prangkisa kondili lakip na ang mga tourist vehicles nga paabangan.

Si Sanson ug Misal nagdumili sa paghatag sa ilang habig apan mipadayag sila nga ilang tubagon sa tukmang lugar ang alegasyon nga gibato batok kanila sa ilang direktor.

Si Apostol miingon nga samtang wala pay sumbong nga napadangat sa ilang buhatan dili una sila manghilabot sa maong isyu. Apan gitataw ni Apostol nga ang angayan nga buhaton ni LTFRB-7 regional director Benjamin Go mao ang pagpasaka og tukmang kaso sa ilang buhatan batok sa duha niya ka mga opisyal. Mipasalig si Apostol nga dalion nila ang pag-imbestigar sa maong kaso kun may tukmang mga dokumento ug ebidensiya kalabot niini. (BANAT NEWS)