4 Tulisan napalpak, usa nila nadunggaban sa ilang biktima

CEBU, Philippines - Usa ka gipasanginlang tulisan mao hinuoy nadunggaban ug nadakpan human gisuklan sa ilaha untang biktimahon nga negosyanteng nanag-iya og junkshop kagahapon sa buntag diha sa dalan MJ Cuenco sa barangay San Roque ning dakbayan.

Gidemalas ang suspek nga si Rey Lahoy-lahoy, 35, taga barangay Babag sa dakbayan sa Lapulapu human kini madunggabi sa tiyan sa iyaha untang biktima nga si Bryan Yap Tecson nga taga barangay Basak-San Nicolas ning dakbayan.

Sumala pa ni SPO2 Rene Serna sa Waterfront Police Station padulong nang mo-parking sa iyang sakyanan si Tecson diha sa junkshop nga Pier Marketing sa biktima dihang nahitabo ang pagsuway og tulis.

Matud pa nga pagkanaog ni Tecson kalit nga miduol kaniya ang usa ka lalaking nailhan sa pangalan nga Cario ug mition og pusil dayon demanda sa gidala niining bag nga may P300 mil.

Apan dihang misenyas si Cario sa laing tulo ka mga kauban aron paduolon nakahigayon si Tecson sa pag-ilog sa armas niini dayong balik niini og tion ngadto kanila.

Kini maoy hinungdan nga mikaratel og dagan ang grupo apan nianang mga tungura si Lahoy-lahoy misuway pa og abli sa awto aron kuhaon ang bag nakabantay ang igsuong babaye ni Tecson nga si Donnabel, 33, kinsa daling mipahibalo kang Tecson.

Tungod niini giduol ni Tecson si Lahoy-lahoy ug gitionan sa maong armas apan gilayog siya niini aron ilugon ang pusil, tungod niini gigamit ni Tecson ang iyang Swiss Knife ug giduslak ang tiyan sa tulisan ug kini iyang nadakpan.

Dugang pa ni Serna nga si Tecson mibutyag nga nakamatikod na siya sa upat ka lalaking kadudahan ang lihok dihang nagpadulong pa siya og parking sa iyang sakyanan maong gikuha na niyang daan ang iyang Swiss Knife.

Nailhan usab sa kapolisan ang laing tulo ka mga kauban niini nga sila si Mark Yay Manayon nga iyahang silingan, si Cario ug ang usa ka giilang si Jomar. Nakuha usab ang paltik nga .38 rebolber nga may sulod nga unom ka buhing bala.Edwin Ian Melecio ug Niña Sumacot sa The Freeman) (BANAT NEWS)