Mga batan-on nagkarambola, 2 angol

CEBU, Philippines - Duha ka mga batan-on ang nangaangol atol sa rambol kagahapon sa kaadlawon atol sa usa ka kalingawan diha sa barangay Poblacion dakbayan sa Talisay.

Ang mga biktima giilang sila si Jimbo Bove Cabusas, 23, taga barangay Dumlog, Talisay kinsa nakaangkon og duha ka samad dinunggaban sa iyang buko-buko ug ang kauban niining si Paray Wayne, 19, taga barangay Duljo Fatima, dakbayan sa Sugbo nakaangkon og gisi sa ulo human mabunali og botilya sa beer sa ilang gikakontra.

Ang duha daling gidala sa Talisay City District Hospital apan gipangbalhin ngadto sa Miller Hospital sa dakbayan sa Sugbo.

Si SPO1 Oliver Dacua, duty desk officer sa Talisay City Police Station nga nahinabi sa Banat News kagahapon nagkanayon nga ang mga biktima uban sa ilang mga higala nga nag-inom sa usa ka beach resort diha sa lugar.

Duha ka mga wala mailhing batan-on ang miduol ngadto sa grupo sa mga biktima ug nangayo og sigarilyo, apan nahibulong nalang sila dihang human nila mahatagi nasuko pa kanila ang mga gikatahapan hinungdan nga sila nagkainitay ug nagkarambola.

Ang mga tawong nanan-aw og kalingawan diha sa plaza sa Poblacion naglumba sa pagpanagan gumikan sa maong kagubot. Samtang ang mga nakadunggab ug nanghapak og botilya dali usab nga miikyas. Si Dacua midugang nga paregla ang motibo sa maong hitabo.  (BANAT NEWS)