Tawo gidauban sa silingan

CEBU, Philippines –  Maayong pagkahilos sa tibuok lawas ug dagway sa usa ka 54-anyos nga mag-uuma human kini bubui og gasolina dayon giduslitan sa 82-anyos nga silingang dugay na niyang kaaway.

Ang insidente nahitabo kagahapon sa udto diha sa barangay Talaga, lungsod sa Argao diin usa ka Paquito Alcarez ang nakaangkon og third degree burn human gidabdaban ni Emerterio Dayap.

Matud pa ni PO2 Von Tecson sa Argao Police Station dihang gikahinabi sa Banat News nga natulog sa higdaanan ang biktima niadtong tungura dihang nahitabo ang insidente.

Sumala pa niini nga nagdala og gasolina ang suspek nga gisulod sa kabo ug sa pikas kamot ang kahoy nga adunay sulo nga nagkalayo ug walay daghang pahimangno gisabligan niini ang biktima dayon giduslitan sa sulo.

Tungod sa gibating pagkapaso nagkasalimuang og dagan ang biktima dungan sa pagpangayo og tabang hinungdan nga nakatawag kini sa atensyon sa mga kabanay kinsa dali usab nga miabot ug nagdala og tubig dayong sablig sa lawas niini.

Ang suspek dali usab nga nakasibat palayo apan gidala siya sa iyang mga anak ug apo ngadto sa barangay hall diin kini gipatahan ug ang mga opisyales nalang sa barangay maoy mi-turnover kaniya ngadto sa kapolisan.

Ang biktima daling gidala sa Panople Medical Clinic ug giingong ibalhin sa usa ka tambalanan sa dakbayan gumikan sa naangkong paso sa kalawasan ilabi na sa bukobuko, nawong, ulo, bukton ug tiyan.

Sumala pang Tecson dugay nang managkaaway ang duha gumikan sa ilang mga yutang giugmad ug kagahapon nahimong mitsa sa ilang kagubot ang patay nga punoan sa mangga nga giingong giputol sa biktima tungod kay delikado alang sa mga bata.

Giingong nasuko ang suspek tungod kay kini giingong tinanom pa sa iyang inahan kaniadto. Ang kapolisan nagtuon pa sa kasong ipasaka batok sa 82-anyos nga suspek.  (BANAT NEWS)