Press Freedom gibuksan

CEBU, Philippines - Pormal nga gibuksan kagahapon sa buntag ang Press Freedom Week 2010 pinaagi sa pagparada sa mga sakop sa media gikan sa Plaza Sugbo sa Cebu City Hall paingon sa Kapitolyo.

Sa social hall sa Kapitolyo gipahigayon ang prorgama nga giunhan sa usa ka Santos nga Misa ni Fr. Generoso Rebaya, SVD.

Sa iyang homiliya, si Fr. Rebaya naghisgot kabahin sa “stewardship” o pagdumala sa mga butang sa kalibutan.

Si Fr. Rebaya miawhag sa mga sakop sa media pagpuyo sa kinabuhing manggihatagon, matinud-anon ug pagkama-alagaron nga kinahanglang adunay pagmahal sa tanang mga buhat.

Matud niini nga ang mga sakop sa media angayang magmatinud-anon sa ilang trabaho ug mohatag og saktong impormasyon ug balita.

Lakbit usab sa iyang homiliya nga ang importante sa broadcast ang pronounciation ug sa print importante ang sakto nga spelling sa gisuwat aron dili masayop ang pagsabot sa katawhan.

Human sa Santos nga Misa, gisunod dayon ang programa nga gipatabanan og mga raffle draw alang sa nagkalainlaing premyo.

Sama sa milabay’ng katuigan pagsaulog sa Press Freedom Week, daghan ang gipanghatag nga mga premyo.

Ang lead convenor niining tuiga mao ang Sun.Star Daily nga maoy napiling grand champion sa dance interpretation, first runner up ang Cebu Daily News ug second runner up ang The Freeman. Ang mga midaog nakadawat og P15,000, P10,000 ug P7,000.

Ang Sun.Star Daily mao usab ang napiling Star of the Parade kagahapon diin ang kategoriya nga sukaranan sa mga hurado mao ang liveliest contingent ug most colorful.

Ang Press Freedom Week taposon karong Sabado Septiyembre 25, 2010. (BANATNEWS)