50 ka balay ugdaw sa sunog sa Banawa

CEBU, Philippines - Mikabat sa 50 panimalay ang gituohang naugdaw sa nahitabong sunog didto sa Sitio Riverside ug Kana-as –Banawa, sa barangay Guadalupe ning dakbayan sa Sugbo kagahapon sa alas 11:00 sa buntag.

Ang maong sunog gipaubos sa 2nd alarm ug gibana-bana nga mikabat og P800 mil ang kadaot.

Sa pakighinabi sa Banat News ni FO3 Antonio Gonzales, nga maoy fire investigator, kini mibutyag nga base sa sugilon sa mga silingan, ang maong sunog naggikan sa 2nd floor sa panimalay nga gipanag-iya nila ni Alfredo ug Josefina Navarro.

Matud pa ni Gonzales nga sa iyang pakighinabi sa pamilyang Navarro gipanghimakak niini ang maong pasangil tungod kay matud pa niadtong tungora didto sila sa silong sa ilang balay.

Mao nalay ilang nasayran dihang ang ilang mga silingan mao nay mipahibalo nga adunay sunog nga nahitabo.

Midugang si Gonzales nga duha ka anggulo karon ang ilang gitan-aw, diin usa niini mao ang kalagmitang mga bata nga nagduwa og lighter o kaha posporo ug ang ika-duha mahimong mi-overheat ang usa ka gamay’ng flourescent lamp nga gisaksak sa outlet nila nga maoy nagpasiugda sa maong sunog.

Hinuon matud pa ni Gonzales nga wala sila maglisod sa ilang agianan sa ilang pagtubag sa sunog gawas sa pagdasok sa mga usisiro nga maoy nakasamok sa ilang agianan.

Wala hinooy naangin nga kinabuhi sa maong hitabo.  (BANATNEWS)