Crime Prevention week saulogon

CEBU, Philippines - Saulogon karong semanaha ang Crime Prevention Week (CPW) sa National Police Commision (NAPOLCOM) nga nagdala sa temang “Kumunidad, Polisya nagkahiusa sa pag-unlad ng Bayan”, sumala pa Atty. Zandro Oriol. Matud pa ni Oriol nga ang CPW ilusad karong Miyerkules, Septiyembre 1 hangtud 7 anha sa Police Regional Office (PRO)-7 diin ipahigayon ang usa ka joint celebration sa tanang ahensya sa gobiyerno sa pagpanguna usab sa Civil Service Commission (CSC).

Sa maong selebrasyon ipahigayon usab ang mga seminar nga tambungan sa mga representante sa nagkalainlaing ahensya sa gobiyerno uban ang mga sakop sa Police Community Relation (PCR). Ipasundayag usab sa taga PCR ang nagkalainlaing programa sa barangay nga gitumong alang sa mga kabatan-onan aron mahilikay   sila sa unsa mang krimen sa palibot.

Gumikan niini giawhag ni Oriol ang katilingban nga hiusahan kining maong kalihokan ug suportahan ang tanang programa sa kapolisan nga gitumong aron matibhangan ang misakang kriminalidad sa palibot ning dakbayan ug sa ubang   bahin sa Central Visayas. (BANATNEWS)