Merkado sa Lapulapu kabungkagon

CEBU, Philippines - Gikabalak-ang malusno ang edipisyo sa merkado publiko sa dakbayan sa Lapulapu busa nahimutang sa peligro ang kinabuhi sa mga vendor, matud pa ni Engr. Alan Pedrigal ang Assistant City Engineer sa maong dakbayan.

Matud pa ni Pedrigal nga nasuta niya ang katalandugon sa maong building sa iyang pag-inspeksyon niini dihang nasud-ong ang kadagko sa mga liki-liki sa mga bongbong niini, busa gikinahanglan lang ang pagpapahawa sa mga vendor sa maong lugar.

Matud pa ni Pedrigal nga kining pagpangliki sa estraktura sa edipisyo nagpasabot nga haguka ug wala nay puwersa ang maong building nga kun linogon, tataw kaayo nga mahapay kini.

Apan dili lamang bongbong ang nangliki kundi bisan ang mga beam niini sa ikaduhang andana.

Usa sa mga hinungdan sa pagkagabok na sa maong edipisyo mao ang parat nga tubig gikan sa mga banyera sa isda nga anha iyabo sa ikaduhang andana sa maong edipisyo.

Kini tungod kay ang seksyon sa isdaan nahimutang sa ikaduhang andana sa maong edipisyo ug matag buhagay sa parat nga tubig nagpagabok sa mga kabilya ug semento sa building.

Gumikan niini giawhag ni Pedrigal nga ibalhin na sa labing daling panahon ang mga vendor ug pabiyaon sa maong edipisyo ug pabalikon lamang sila kun maayo na kini.

Samtang si Rolando Duero ang Secretary to the Mayor mitug-an nga dili na mahinayon ang pagbalhin sa mga vendor ngadto sa ubos nga bahin sa Muelle Osmeña wharf gumikan sa kakulang sa pasilidad, sanitasyon, tubig ug suga sa maong lugar.

Gumikan niini si Mayor Paz Radaza mimando nga adto sila ibalhin sa   dalan J.P. Rizal Street, Mangubat Street, ug sa F. Martir Street nga dili kaayo layo sa merkado publiko.

Si Elena Caballes ang Lapulapu Market Administrator mibati usab og kamaya kay mao usab kini ang gihangyo sa mga vendor ngadto kaniya atol sa ilang panagtagbo.

Si Franz Brazil usab sa iyang bahin wala mabalaka sa sitwasyon unya sa dagan sa trapiko kay gamay lamang sa mga dalan ang maapektohan sa mga mobalhin nga vendor. (BANAT)