4 tulisan gidemalas nadakpan

CEBU, Philippines - Upat ka mga batan-ong suspetsado sa pagpanulis ug pagpangawat ang nadakpan sa kapolisan sa barangay Labogon, dakbayan sa Mandaue alas -8 pasado ang takna kagahapon sa buntag.

Ang nadakpan mao sila si Richard dela Pena, 20, Brian Montecalvo, 21, Robert Almogiel Jr., 19, ug usa ka 15-anyos nga batang lalaki nga pulos molupyo sa nahisgutang dapit ug giingong mga sakop sa Alpha Kappa Rho fraternity.

Ang pagdakop sa mga suspetsado ang natigayon sa follow-up operation sa kapolisan human sa duha ka mga nagsunod nga pagpanulis sa maong dapit.

Ang unang gitulis sa mga suspetsado mao si Ryan Torres, 21, nga usa ka apprentice sa Uni Link company nga nagbase sa maong dapit kinsa mitug-ang kalit siyang gisukmag sa tulo ug sa iyang pagsukol gitiunan siya og armas ug gipangayo ang iyang salapi ug cellphone.

Sa paglabay sa pipila ka gutlo lain na usab ang gibiktima sa upat ug kini mao si Cesar Baga Jr., 22, nga matud pang PO2 Leny Matunog sa intelligence division sa Mandaue City Police Office nakuhaan kini og salapi ug cellphone.

Ang duha pulos midangop sa mga tanod kinsa nagpatabang sa sakop sa kapolisan sa MCPO ug ang intelligence division nga miresulta sa pagkasikop sa maong mga suspetsado apan wala na makuha ang mga kabtangan sa mga biktima.  – BANAT NEWS