Nangihi gipusil angol

CEBU, Philippines - Samdan sa bukton ang usa ka lalaki human kini pusila sa iyang silingan samtang siya nangihi sa daplin sa karsada sa sitio Ilang-Ilang, barangay Sawang Calero, dakbayan sa Sugbo sa miaging kaadlawon.

Ang biktima mao si Gilbert Juanico, 23, taga Ilang-Ilang, ug walay trabaho, samtang ang suspetsado gitumbok usab sa kapolisan nga mao si Michael Beldinesa alyas Katok nga iyang silingan.

Sumala sa kapolisan nga ang biktima nagpaingon na sa ilang balay dihang mitubag kini sa sugo sa lawas ug sa pag-atubang niya sa pader, naputol ang iyang pagpangihi dihang mipaka lang og kalit ang buto sa armas de fuego ug didto motaroy ang bala sa iyang walang bukton.

Dali siyang gihatod ngadto sa Cebu City Medical Center, samtang nakasibat usab dayon ang suspetsado ug gipangita pa karon sa kapolisan. –  BANAT NEWS