BEI, support staff sa BJMP wala pa kadawat honorarium

CEBU, Philippines - Mipadangat og reklamo ngadto sa buhatan sa Commission on Elections provincial office ang pipila ka mga miyembro sa Board of Election Inspection lakip na mga support staff nga wala pa sila mabayari sa ilang honorarium sa ilang pagtrabaho sa nakalabay’ng Mayo 10 nga piniliay diha sa mga bilanggoan.

Kasagaran sa mga reklamo nadawat gikan sa election officer sa dakbayan sa Mandaue nga si Atty. Marchel Sarno nga mga sakop sa Bureau of Jail Management and Penology.

Si Sarno sa iyang bahin miingon nga nagpunay na sila og follow up sa gahin alang sa mga honorarium sa BEI ug sa support staff sa BJMP apan hangtud karon ang Comelec Manila padayon pang nagproseso sa maong gahin.

Wala pa usab siya masayod kun kanus-a kini mahatag ngadto sa mga wala pa mabayring BEIs ug support staffs.

Sigon pa ni Sarno nga ang maong problema wala lamang masinati sa dakbayan sa Mandaue kun dili apil sab ang sa dakbayan sa Lapu-lapu, Toledo ug siyudad sa Sugbu.

Mipasalig hinuon silang hayan sa sunod semana mapagawas na ang maong pundo ug mahatag na ngadto sa mga miserbisyo atol sa eleksyon. - BANAT NEWS