Dispatser gipusil namatay

CEBU, Philippines - Duha ka mga tawo ang gipamusil sa managlahing dapit sa dakbayan sa Sugbu sa miaging gabii diin usa niini patay nga nahitabo diha sa sitio Mohon 2 sa barangay Tisa.

Ang gipatay mao si Enrique Ondiano Autor Jr., 50, usa ka dispatser nga nagpuyo sa maong dapit kinsa nakaangkon og samad pinusilan sa ulo human kini pusila sa wala mailhing lalaki.

Sa pasiunang imbestigasyon ni SPO3 Rey Cuyos ug mga kaubanan sa Homicide Section sa Cebu City Police Office (CCPO) nga mipalit og sigarilyo si Autor sa tindahan nga gipanag-iya ni Bonifacio Mendrano.

Apan sa iyang paglakaw kalit kining gipusil. Si Mendrano daling misusi diin gikan ang buto sa armas ug mao nalay iyang nakit-an si Autor nga nagbuy-od na ug nagkadugo apan walay laing tawo diha sa palibot.

Ang kapolisan padayon pang nihimo sa ilang imbestigasyon pag-ila sa mamumuno ug sa motibo niini.

Ang ikaduhang gipusil mao si Danilo Fernandez 56, taga sitio Alumnos sa barangay Basak-San Nicolas kinsa gipusil sa usa ka Oliver Maglinte alyas “Ebing” nga nagpuyo sa sitio Seaside, Alumnos sa samang barangay.

Gikatahong naglingkod ang biktima diha sa daplin sa taytayan ug ang suspek nag-inom duol sa biktima, dangtan pila ka gutlo giduol ni Maglinte si Fernandez dayong pusil kini sa walang bahin sa lawas, sa nawong ug sa liog. (BANATNEWS)