Maayo mosayaw gipusil

CEBU, Philippines - Usa ka ulitawong guwang kinsa maayo mosayaw gipusil angol sa wala hiilhing kriminal sulod sa baylihan sa sitio Portland, barangay Cahumayhumayan, sa dakbayan sa Danao sa miaging gabii.

Ang biktima mao si Robert Gonzales, 40 , ulitawo nga taga F. Ralota, barangay Poblacion sa nahisgotang dakbayan.

Si SPO4 Jose Salingua sa kapolisan sa Danao mibutyag sa Banat News  nga gitapokan sa katawhan ang biktima kay nalingaw sila og tan-aw sa pagkahanas mosayaw niini.

Apan samtang maayo kaayong ikid-ikid , tutakilid, duko-duko , kiyod-kiyud ug hayang-hayang, uban sa wala usab hiilhing babaye, kalit lang mipaka ang buto sa armas de fuego ug naigo ang liog sa biktima.

Gihatod dayon ang biktima ngadto sa Danao District Hospital apan gibalhin usab dayon ngadto sa Vicente Sotto Memorial Medical Center sa dakbayan sa Sugbo samtang gipangita pa sa kapolisan ang kriminal.  (BANATNEWS)