Mananaog sa unang distrito giproklamar

CEBU, Philippines - Ang mga kandidatong mananaog sa milabay’ng eleksiyon sa mga kalungsoran ug dakbayan sa unang distrito sa probinsiya sa Sugbo giproklamar dayon kagahapon sa mga opisyal sa Commission on Elections (Comelec).

Kagahapon sa alas 10:00 sa buntag, si Mayor Valdemar Chiong nasublian gihapon sa maong posisyon sa boto nga mikabat sa 32,280 batok sa iyang kaatbang nga si Esperidion Cañoneo kinsa nakakuha lang og 8,413 botos.

Sa pagka-bise mayor sa maong dakbayan , si bise mayor Delfin Señor maoy midaog sa botos nga 27,528 , samtang ang kaatbang niining si Jocelyn Ong nakakuha lang og 9,333 botos.

Sa lungsod sa San Fernando ang incumbent mayor nga si Lakambini “Neneth” Reluya naparot sa iyang Bise Mayor nga si Antonio “Abby” Canoy.

Si Canoy nakaangkon og 15,329 nga boto, samtang si Reluya 14,055 botos ra.

Ang running-mate ni Reluya nga si Erico Enad napildi usab sa running mate ni Canoy nga si Mikko Canoy, anak sa naulahi.

Si Mikko nakaangkon og 14,247 botos, samtang si Enad nakakuha lang og13, 527 botos.

Sa dakbayan sa Talisay si incumbent mayor Socrates Fernandez ug si bise mayor Alan Bucao pulos subling napili sa ilang mga katungdanan.

Si Fernandez nakaangkon kini og 43,164 botos, samtang ang iyang lig-ong kaatbang nga si kanhi Bokal Raul Bacaltos nakaangkon lang og 30,633 botos.

Si Bucao nakakuha og 39, 155 botos batok sa iyang kaatbang   nga si kanhi bise mayor Aberdovey Belleza kinsa nakakuha lang og 32,676 botos.

Sa mga konsehal sa siyudad, duha ka sakop sa administrasyon nga sila si Association of Barangay Captain (ABC) Osmundo Manreal Jr. ug Aaron Capala, pulos nangatagak.

Si Manreal nakakuha og 25,937 botos, ug si Capala 21,144 botos.

Ang mga oposisyon nga midaog sa pagka-konsehal sa siyudad mao sila si Danilo Caballero kinsa nakakuha og 31, 290 botos ug Romeo Villarante nga may 30, 988 botos.

 Ang apo ni Kongresista Eduardo Gullas nga si Eduardo Gullas III maoy napiling number one councilor sa Talisay, diin nakakuha kini og 38,437 botos.

Gisundan kini ni konsehal Rodolfo Cabigas, nga may 37, 112 botos, Valerino Ylanan, 35,528, Dennis Basillote, 35,371 , Richard Francis Aznar, 35, 313 , Celiapo Cabuenas, 31,863 , Bernard Joseph Odilao, 31,398, ug ang ika-napulo mao si Edward Alesna nga nakakuha og P28, 120 botos.

Si Caballero maoy nahimutang sa ika-walo samtang si Villarante maoy ika-siyam.

Sa dakbayan sa Carcar, kagahapon sa pasado alas 3:00 sa hapon naproklamar usab nga mananaog sa pagka-mayor si Bise Mayor Nicepuro Apura kinsa nakakuha og 22,235 botos, samtang ang iyang kaatbang nga si Dr. Nestor Velez nakakuha og 21, 339 botos.

Si Mayor Patrick Barcenas kinsa mikandidato sa pagka-bise mayor nakakuha og 29, 116 batok sa iyang kaatbang nga si Pedro Paden kinsa nakakuha lang og 12, 316 botos.

Sa lungsod sa Minglanilla si incumbent mayor Eduardo Selma ug incumbent vice mayor Elanito Peña pulos subling napili sa ilang mga katungdanan.

Si Selma nakakuha og 30, 491 botos ug si Peña may 21,589 botos.

Ang kaatbang ni Selma nga si Romulo Cañezares nakakuha lang og 4,079 botos, samtang si Marlo Cañada nga kaatbang ni Peña nakakuha lang og 21,589 botos.

Sa lungsod sa Sibonga ang incumbent mayor nga si Lionel Bacaltos mao gihapon ang napiling mayor sa botos nga 12, 363 batok sa iyang kaatbang nga si Nestor Ponce kinsa nakakuha og 10, 560 botos.

Ang running mate ni Bacaltos nga si Cerelo Apuda nakakuha og 12, 121 botos nga midaog batok sa iyang kaatbang nga si incumbent vice mayor Gina Patalinghug kinsa nakakuha lang og 6,439 botos.