Palcuto andam na

CEBU, Philippines - Ang independenting kandidato pagka-bise mayor Rico Palcuto sa dakbayan sa Sugbo andam na alang sa piniliay sa Lunes apan miawhag sa mga botante sa pagpili sa mga tarong ug ligdong nga mga kandidato.

Mao kini ang gibutyag kagahapon ni Dondon Ofquera, ang sinaligan ni Palcuto kinsa nagkanayon nga nabalaka ang retiradong koronel sa kapolisan nga basin mosipyat unya ang katawhan ug makapili na hinuon og mga opisyal nga dili haom sa ilang katungdanan.

Miingon si Ofquera nga nangandam na si Palcuto sa iyang misyon kun palaron siyang mapili sa katawhan ning dakbayan isip bise mayor.

Kini tungod kay ang kasinatian ni Palcuto sa natad sa pagpatuman sa disiplina aron makab-ot ang kalinaw ug kahusay sa mga lugar nga nadestinohan niya kaniadto sa dihang aktibo pa siya sa panerbisyo sa pagka-polis maoy iyang sagupon.

 Matud pa ni Ofquera nga nahilakip sa listahan ni Palcuto nga iyang wagtangon gawas sa mga tulisan, kawatan, mangingilad ug uban pa mao ang mga grupo sa makililimos, kay iya kining hatagan og permanenting kapuy-an ug did-an na sa pagpakilimos sa sulod ning dakbayan.

Ang mga kriminal adto niya papuy-a sa prisohan ug ang mga rugby boys, pitolon aron dili na mahimong mansa ug taya sa katilingban. – BANAT NEWS